"Сокол" сыах байыастарга 50 саҥардыллыбыт тиэхиникэни оҥорон ыытыаҕа

Саха сиригэр квадроцикллары оҥорор  "Сокол" сыах анал байыаннай дьайыыга анаан, саҥа саҥардыллыбыт тиэхиникэни Өрөспүүбүлүкэ сорудаҕынан оҥорор буолуоҕа. Үлэ билигин саҕаланан, сотору кэминэн бастакы партияны оҥорон таһаарыахтара.

Бу курдук, "Сокол" тимир көлөтүн оҥорор сыахха үлэ күөстүү оргуйар. Саха сиригэр 2017 сыллаахтан үрдүк кыамталаах квадроцикллары оҥорон саҕалаабыттара. Онтон ыла син бириэмэ ааһан, билигин итинник тиэхиникэ 4 араас көрүҥүн оҥорон таһаарар буолбуттар.

Тимири быһар лазернай станоктан үлэ саҕаланар. Манна күннэтэ араас халыҥнаах тимирдэри кээмэйдээн быһаллар. Ол курдук Николай Барабанов биир тимир илииһиттэн элбэх туһаны ылар туһуттан, барытын суоттаан-учуоттаан баран биирдэ станогун холбуур.

"Сокол" сапчааһын 70 быраһыана Арассыыйа иһигэр оҥоһуллар уонна барыта илииннэн таҥыллар буолан, бу массыыналар быдан бөҕө уонна модьу буолаллар. Биир квадроциклы 4 күн иһигэр оҥорон бүтэрэллэр, онтон биир ый иһигэр 10 таһаараллар.

Бу массыыналар ханнык да ойуур суолуттан куттамматтар. Бадарааны, үрэҕи туоруур кыахтаахтар, өрүс устун усталлар, тоҥуу хаарынан эмиэ сылдьаллар. Анал байыаннай дьайыыга Саха сириттэн кытта сылдьар уолаттарга Өрөспүүбүлүкэ салалтата 9 "Соколы" ыытан, бу массыыналар бэйэлэрин кыахтарын үчүгэйдик көрдөрөн, аны 50 саҥардыллыбыт "пикап" кузовтаах тиэхиникэни оҥорон ыытарга былаан бэриллибит.

"Байыастарбыт сөбүлээтилэр. Квадроциклларбыт түүннэри-күнүстэри  үлэлииллэр. Бородуукта, саа сэбиргэл, бааһырбыт байыастары тиэйэн таһаллар. Түргэннэр, тыаһа-ууһа суохтар, судургутук ыытыллар. Ким баҕар ыытыан сөп", - диир "ЯКТ СОКОЛ" хампаанньа төрүттээччитэ Николай Алексеев.

"Соколу" оҥорон таһаарар сыаҕы дойдубут президиэнин Уһук Илиҥҥи уокурукка болномуочуйалааҕа Юрий Трутнев, бу күннэргэ Саха сиригэр үлэлиир сырыытын кэмигэр көрөн, үлэлэрин-хамнастарын кытары билсэн, сыах үлэтин үрдүктүк сыаналаата.  Бу курдук үрдүк хаачыстыбалаах тиэхиникэлэри оҥорон таһаарыыны өйүүрүн биллэрдэ.