Норуот маастарын күнүн кыайыылаахтара ааттаннылар
Норуот маастардарын уонна уран тарбахтаахтарын оҥоһуктарыгар анаммыт айар быыстапка сыл саамай күүтүүлэх бөдөҥ тэрээһининэн биллэр. Быйыл өрөспүүбүлүкэ үгүс улуустарыттан барыта тыһыынчаттан тахса маастар үлэтэ турда. Булуҥ улууһуттан төрүттээх Екатерина Никитина быыстапкаҕа аан бастакытын кытынна. Кини ийэтин үөрэҕинэн эдэриттэн иистэнэрин сөбүлүүр. Төрүт эбэҥки таҥаһын тигиигэ ыччаты үөрэтэр. Екатерина Васильевна түмүктүүр тэрээһиҥҥэ уус-уран оҥоһук маастара бочуоттаах ааты сүктэ.
Екатерина Никитина, быыстапка кыттыылааҕа, СӨ уус-уран оҥоһуктар маастара: "Араас маастар-кылаастары ыытан, анал үөрэхтэри тэрийэммин эдэрдэри үөрэтэ сатыыбын. Эбэҥки таҥаһын тигиигэ ирдэбил кытаанах. Ол иһин эдэрдэри сон сиэҕин тигииттэн саҕалаан бэйэм холобурбар уһуйарга кыһаллабын".
Быыстапкаҕа мастан-муостан,кылтан, тимиртэн араас эгэлгэ оҥоһуктар, национальнай көстүүмнэр, иһиттэр-хомуостар, көбүөрдэр, араас киэргэллэр көрөөччү биһирэбилин сыллата ылаллар. Уопуттаах маастардары тэҥэ саҥа саҕалааччылар эмиэ бэйэлэрин айымньыларын туруораллар. Өлөөн улууһуттан төрүттээх Михаил Андреев оҕуруонан киэргэллэри тиһиинэн үлүһүйэр. Маны тэҥэ Михаил ааспыт сылтан хотугу норуоттар таҥастарын лабораториятын салайааччытынан анаммыта. Быйылгы быстапкаҕа 23 саастаах Арктикатааҕы культура институтун устудьуона уус-уран оҥоһук маастара үрдүкү ааты сүгэр чиэскэ тигистэ.
Михаил Андреев, быыстапка кыттыылааҕа, СӨ уус-уран оҥоһуктар маастара: "Лабораториябыт бу сылтан үлэтин саҕалыа. Уопсайа барыта биэс аҕыйах ахсааннаах норуоттар таҥастара манна тигиллэн тахсыахтаах. Лабораториябытыгар күн бүгүн уонтан тахса маастардаахпыт".
Саха сирин үрдүнэн 600-тэн тахса иистэнэр, уһанар маастар баар. Онтон 275 киһи норуот маастара үрдүкү ааты сүгэр. Уус-уран оҥоһуктарынан 5 тыһыынча тахса киһи дьарыктанар, сыллата кинилэр ахсааннара эбиллэн иһэр. Маныаха бу салааны сайыннарыыга судаарыстыба өттүттэн 10 сыллаах концепцияны таҥыыга үлэ барыаҕа. Бу туһунан Ил Дархан Айсен Николаев норуот маастардарын уонна кинилэр үөрэнээччилэрин кытта көрсүһүүгэ эттэ.
Айсен Николаев, СӨ Ил Дархан: "Бизнеһы уонна култуураны тэҥҥэ тутан сайыннардахпытына улахан ситиһиилэниэхпит. Мин итини ис сүрэхпиттэн итэҕэйэбин. Эһиги этэргит оруннаах. Дьокуускай куоракка кииннээх буолуохтаахпыт, биир өттүэр оҥорон таһаарыы, биир өттүгэр быыстапкалыыр сир".
Көрсүһүүгэ маны тэҥэ норуот маастардарыгар 7 хайысханан тустаах стипендия харчы туруорсуутун Айсен Николаев өйөөтө. Ол курдук олоҥхоһуттарга, оһуокайы этээччилэргэ, тимир уустарыгар сыллата туттарыллар өйөбүл курдук көрүллэр буолуоҕа. Маныаха бу миэрэлэри олоххо киллэрии балаһыанньатын аны сайыҥҥа диэри таҥыахтара. Уус Алдан улууһуттан сылдьар Петр Нафанаилов дэгиттэр талааннаах маастар, кини төрүт саха иһитин-хомуоһун оҥоруунан утумнаахтык дьарыктанар. Түмүгү таһаарар тэрээһиҥҥэ Петр Сергеевич норуот маастара үрдүкү ааты сүгэр чиэскэ тигистэ.
Пётр Нафанаилов, быыстапка кыттыылааҕа, СӨ норуот маастара: "Мантан тирэх ылан дьоммут норуоппут туһугар, сахабыт иһитэ-хомуоһа сайдарын туһугар биһиги өссө күүскэ үлэлиэхпит".
4 күннээх быыстапка түмүгүнэн барыта 12 хайысханан кыайыылаахтары таллылар. Маны тэҥэ, бастыҥ үлэлээхтэргэ бочуоттаах ааты иҥэрдилэр.