Дьокуускайга ыраастаныы ыйдара

Дьокуускайга үс ыйдааҕы санитарнай ыраастааһын тэрээһиннэрэ биллэриллэн үлэ ыытыллар. Хаары, тоҥмут бөҕү-саҕы тиэйии-таһыы  ириэрии иннинэ хайаан да барыахтаах. Онон тэрилтэлэр, салайар хампаанньалар, ТСЖ-лар кэмигэр былаан ылынан үлэлииллэр.

Дьокуускайга куорат дьаһалтатын уурааҕынан сыллата буоларын курдук санитарнай ырааһырдыы тэрээһинэ биллэриллиннэ. Куорат үрдүнэн уһун кыһын устата мунньуллубут хаары, бөҕү-саҕы ыраастааһын,  тиэйии-таһыы үлэтин күүһүрдэн бириэхтэрэ.

Саас кэлэрин саҕана Дьокуускайга хаары кытта охсуһуу түбүгэ кытаатар. Быйыл хаар элбэх диэн үлэһиттэр кэпсииллэр. Владимир Чемезов муниципальнай дворник диэн дуоһунастаах. Үлэлээбитэ 4 сылыгар барда. Кини сарсыарда 8 чаастан киэһээ 5 чааска диэри кыһынын бэйэтин уокуругун сирин-уотун, уулуссаларын, сатыы киһи хаамар сылдьар сирдэрин ыраастыыр Онтон сайыҥҥы кэмҥэ мас олордуутугар, хомус охсооһунугар, тупсарыы үлэтигэр кыттар.

Владимир Чемезов, Октябрскай уокурук үлэһитэ: "Мин Тургенев, Каландаришвили, Орджоникидзе уулуссаларыгар сыһыарыллан үлэлиибин. Дьон сылдьарыгар табыгастаах буоллун диэн үлэллибит".

Бу кэмҥэ хаары ыраастааһын үлэтэ күүһүрэр. Дьокуускайы хаартан, муустан ыраастыырга күҥҥэ анаан-минээн 30-40-ча тиэхиникэ тахсар. Икки симиэнэнэн солбуйсан үлэ күөстүү оргуйар. Кун устата хомуйбут хаардарын тустаах сиргэ аҕалан куталлар. Күҥҥэ ортотунан 3,5 тыһ. кууб хаары сүөкүүллэр. Маныаха ыраас уонна кирдээх хаары тус -туһунан полигоҥҥа илдьэллэр. Хаары ыраастааһыны, уопсайынан сөпкө дьаһаныыны, эппиэттээх тэрилтэлэр кэмигэр ыытыахтаахтара дойду судаарыстыбыннай тутуутун балаһыанньатыгар ыйылла сылдьар. Ону толорбот түгэннэригэр салайар хампаанньа биитэр муниципальнай тэрилтэ административнай эппиэтинэскэ тардыллар.

Валентин Эверстов, Октябрскай уокурук салайааччыта: "Былааммытын номнуо ылынан олоробут. Билигин сүрүннээн чигдини ыраастыырга үлэ барар. Уопсайа 300 куубу таһаарыахтаахпыт. Онтон улахан аҥара тиэллэн турар. Бу иһигэр тэҥэ дьиэ үрдүн хаарын түһэрии, олорор дьиэлэр тиэргэннэрин хаарын таһыы киирэр".

Сотору кэминэн дьиэ үрдүлэриттэн хаары ыраастыахтара. Олорор дьиэлэртэн эрэ буолбакка, үөрэҕирии, культура,спорт, доруобуйа харыстабылын эбийиэктэриттэн уопсайа сүүһүнэн тэритэлэртэн хары түһэрии тэрээһинэ ыытыллыаҕа. Хаары тиэйии-таһыы таһыы ордук чааьынай дьиэлэрдээх оройуоннарга сытыытык куерэйэр.  Чааһынай сектор олохтоохторо хаардарын бэйэлэрэ ыраастыахтаахтар. Хомуйбут хаардарын булгуччу туһааннаах полигоҥҥа илдьэн сүөкүөхтээхтэр. Өскөтүн мээнэ быраҕар түннэригэр  ыстарааптаныахтарын сөп. 

Халлаан эмискэ сылыйыыта, инники еттугэр букатын ууга устар кутталы уескэтиэн сеп. Онон кэмигэр барыта хомуллан тиэллэрэ ордук.