Үйэлэри уҥуордаан, уруйдан үөрэхпит кыһата!

Дьокуускайга Ярославскай аатынан Саха сирин норуоттарын култууратын уонна историятын тумэлигэр Бүлүүтээҕи педагогическай колледж төрүттэммитэ 100 сылыгар анаммыт быыстапка аһылынна. "Үйэлэри уҥуордаан, уруйдан үөрэхпит кыһата!" диэн ааттаммыт тэрээһиҥҥэ өрөспүүбүлүкэ биир саамай кырдьаҕас үөрэҕин кыһатын үлэһиттэрэ, бэтэрэннэрэ, араас сылларга бүтэрбит выпускниктара кытыннылар.

Саха сирин биир кырдьаҕас ааттаах-суоллаах орто анал үөрэҕин кыһата - Бүлүү педагогическай коллеһа, бэлиэ төгүрүк сылын ытыгылаан, Дьокуускайга, саха түмэлигэр колледж историятын кэрэһэлиир быыстапкаҕа бар дьону ыҥырар. История кэрчик кэмиттэн ыллахха, оччотооҕу 1922 сыллаахха атырдьах ыйыгар Саха сирин Наркомпроһун кэллиэгийэтин ыйааҕынан Бүлүү куоратын 2-с сүһүөх оскуолата диэн ааттанан үлэтин саҕалаабыта. Бастакы дириэктэр, оччотооҕуга сэбиэдиссэй, Николай Новиков, бастакы учуутал Петр Староватов уонна бастакы выпускник Николай Егоров ааттара үөрэх кыһатын историятын саҕаланыытын кэрэһэлииллэр. 

Матрёна Саввинова, Бүлүүтээҕи идэтийбит педагогическай колледж научнай-методическай салаатын методиһа: "Биһиги үөрэхпит кыһатын бүтэрбит өрөспүүбүлүкэ сайдыытыгар үлэлэспит ааттаах-суоллаах дьоммутун көрдөрөр быыстапка".

Бастаан иккис сүһүөхтээх оскуола, техникум, онтон учуилище, салгыы колледж, онтон 3 сыллааҕыта профессиональнай педагогическай колледж диэн аатын улырыппыта. Бүтүн 100 сыл устата үөрэх кыһата 16 тыһыынчаттан тахса араас идэлээх педагогическай үлэһиттэри иитэн-үөрэтэн таһаарда. Кинилэр ортолоругар өрөспүүбүлүкэҕэ киэҥник биллибит тумус туттар дьоммут бааллар. Социалистичскай үлэ геройдарыттан саҕалаан үөрэҕирии туйгуннарыгар тиийэ араас буочуоттаах суруналыыстар, суруйааччылар, министиэристибэлэр, тэрилтэлэр, улуустар салайааччылара үөрэнэн үүнэн тахсыбыттара.

Иван Алексеев, Бүлүүтээҕи идэтийбит педагогическай колледж дириэктэрэ: "Колледж билигин 8 салаанан арааран үөрэтэр. Ол иһигэр 3 техническэй салаа. Манна уопсайа барыта өрөспүүбүлүкэ араас улуустарыттан 820 оҕо үөрэнэр уонна кэтэхтэн 250-чэ оҕо үөрэнэр".

Быыстапкаҕа 500-тэн тахса экспонат турда. Манна дьоһун дьон тус малларыттан, наҕараадаларыттан саҕалаан, араас истиэндэлэри, үөрэх кыһатын хас биирдии сылларынан ахтыылары, ураты матырыйааллары көрүөххэ сөп. Тэрээһин үөрүүлээх аһыллыытыгар хас биирдии киһи колледж дириэктэриттэн, Бүлүү улууһун баһылыгыттан саҕалаан эҕэрдэ тылын, баҕа санаатын тиэртэ. Үөрэх кыһатын бүтэрбит выпускниктар кинилэр ортологругар Климент Иванов, Манчаары оонньууларын төрүттээбит спорт бэтэрээнэ Афанасий Алексеев, онтон да атыттар колледж 100 сыллаах үбүлүөйдээҕи мэтээллэринэн наҕараадаланнылар.

Лиана Свинобоева, Бүлүүтээҕи идэтийбит педагогическай колледж устудьуона: "Бүлүүгэ үөрэнэрбин олус сөбүлээтим. Үөрэҕим таһынан устудьуоннар идэлээх сойуустарыгар киирэн үлэлии сылдьабын. Маны сэргэ колледж медиа киинигэр киирбитим. Онон үбүлүөйдээх тэрээһиҥҥэ көмөлөһө кэлэ сылдьабын".

Улуу нуучча суруйааччыта Николай Гаврилович Чернышевскай аатын сүгэр Бүлүүтээҕи профессиональнай педогогическай колледж 100 сыллаах баай историятын кэрэһэлиир быыстапка кулун тутар 10 күнүгэр диэри үлэлиэҕэ.