Тымныы уҕараабат

Хойуу туман Дьокуускайы бүрүйэр. Ити да бу да турара көстүбэт. Темпуратура -50 тахсыбатаҕа номнуо нэдиэлэ кэриҥэ буолла. Онон дьон араастаан тымныыттан харыстанар суолу тобулар. Бааһынай ырыынагын атыыһыта Марина Левина таба тириитэ сагынньахтаах уонна олбохтоох буолан хайа да томороон тымныыны ахсарбат. Сонун иһинэн эмиэ таба түүтэ истээх сэлиэчиктээх уонна атаҕын сылааска тутардык кыһанар.

"Быйыл олус тымныы кыһын буолла. Саатар олох ыһыктан быстыбат. Хотулар курдук таба тириититтэн сагынньахтаах уонна икки хос тирии үрдүгэр турар эрэ буоламмын тымныыны тулуйабын" - диэн Марина Левина санаатын үллэстэр. 

Ырыынак үлэтэ дьыл хайа да кэмигэр тохтообот. Олохтоох эти, балыгы атыылаһааччы ахсаана эмиэ аччаабат. Онтон томороон тымныылартан халыҥ таҥаһы сэргэ итии чэй уонна тэтимнээх үлэ быыһыыр.

Матрена Старостина, атыыһыт: "-50 кыраадыска тыала суох буоллаҕына киһи улаханнык тоҥмот. Күнү быһа хамсана сылдьар буоламмыт тоҥмоппут".

Нэдиэлэттэн ордук турар тымныыны техника тулуйбат түгэнэ күннэтэ тахсар. Холобур, ааспыт сылга кэлбит улахан кыһыл оптуобустар Саха сирин кыһынын тургутуутун ааспатылар. Онон сылтаан улуустарга сырыы тохтотулунна. Дьокуускай-Хатырык хайысха суоппара Павел Турантаев "Саҥа көлөбүт үлэлииргэ олус табыгастаах, киһи олох сылайбат, ол эрэн -45 кырадыска тоҥор эбит. Аҥардас гааһынан барар буолан онто тоҥор. Ол иһин айаннаан иһэн умуллан халыа диэн сэрэхтээн сырыыны тохтоттулар" диэн МУТ "ЯПАК" суоппара Павел Турантаев этэр. 

Онон Дьокуускайтан Мохсоҕоллооххо, Хатырыкка уонна Бэрдьигэстээххэ сылдьар үс маршрут үлэтэ халлаан сылыйыар диэри аҕыйах хонукка тохтоото. Тэрилтэ салалтата уонна улуус баһылыктара буолан сүбэлэһэн дьон олоҕор сэрэхтээх түгэн тахсыа диэн дьаарханан бу быһаарыныыны ыллылар. Тохсунньу тоһуттар тымныытын техника эрэ буолбакка көтөр-сүүрэр кытта тулуйбат. Уус Алдан улууһугар барабыай хаарга токуччу тоҥмут видеота социальнай ситим устун тарҕанан, амарах сүрэхтээхтэр чычаахтары аһатарга ылыстылар. Маны сэргэ үгүс дьон бытархан тымныыны чэпчэкитик ылынан киһини сөхтөрөр устуулары оҥороллор. Ол курдук тута тоҥор мыыла хабаҕа киэҥник тарҕанна, итиэннэ уунан куттааччылар бу күннэргэ тулуурдарын бар дьоҥҥо үгүстүк көрдөрдүлэр. 

Күнү-дьылы кэтээн көрөр сулууспа иһитиннэрэринэн халлаан нэдиэлэ бүтүүтэ арыый сымныа. Өрөспүүбүлүкэ үгүс өттүгэр күнүһүн -43-45 кыраадыс буолуо диэн иһитиннэрэллэр