Ирбэт тоҥу үөрэтии

Дьокуускайга суол үлэһиттэрэ Хотугулуу Илиҥҥи федеральнай университеты кытта ирбэт тоҥу үөрэтэллэр. Быйыл үөс суолу оннуттан өрөмүөннээн, күн бүгүн, киин кэрчик суолга сырыыны биэрбиттэрэ. Саҥа оҥоһуллубут суол аннынааҕы бүрүөһүн, ирбэт тоҥҥо хайдах дьайбытын чинчийии саҕаланна. Ленин проспегар барыта 9 сиринэн 15 миэтирэни дьөлөн, сир температуратын көрдөрөр тэриллэри түһэрдилэр. Өрөмүөн үлэтин кэмигэр сир аннынааҕы муус ууллан эрэрэ бэлиэтэммитэ. Ирбэт тоҥу харыстаан хаалларарга, пенополистерол матырыйаалы туһаммыттара. Чинчийии 3 сыл кэриҥэ барыаҕа.

“Сайыны быһа көрбүккүт курдук, биһиги аҥаардас буор эрэ үлэтин оҥорбокко, эбиитин чинчийии үлэтин оҥордубут. Ол аата университеттары, тутаах иснтитуттары кытта биир тыл буламмыт, термометрическай туруубкалары эбии скважиналары үүттээн угаммыт, билигин бу проспект Ленина инженернай коммуникация уонна тыраанспар хайдах дьайарын  быһаарар чинчийиибит бара турар”, - диэн "Главстрой" тэрилтэ суол тутар салаатын салайааччыта Владимир Макаров кэпсээтэ.

Суол үлэһиттэрэ саҥа суоллар анныларыгар ыытыллар үлэ, ирбэт тоҥҥо хайдах дьайарын сиһилии үөрэтиллэрэ наадалааҕын бэлиэтииллэр. Быһа холоон быһаарыынан, суол анныгар ууруллубут матырыйаал, ирбэт тоҥ салҕыы уулларын тохтотто, дьайыыта көдьүүстээх диэн буолла. Научнай чинчийиилээх үлэ - үйэлээх. Үөрэтии түмүгэ инникитин, инженернэй-коммуникационнай үлэни ыытарга, төһүү күүс буолуоҕа.