"Триумф" спорт уораҕайа үбүлүөйдээх 10 сыла
Спорт көрүҥнэригэр Саха сирин сүүмэрдэммит хамаандаларын бэлэмниир "Триумф" киин 10 сылын бэлиэтээтэ. Баараҕай спорт уораҕайа өрөспүүбүлүкэҕэ спорт сайдыытыгар сүҥкэн суолталаах. Манна 10 сыл устата үгүс спортмен үүнэн-сайдан таҕыста, урдук таһымнаах үгүс күрэхтэһии ыытылынна.
Мас тардыһыытыгар Россия сүүмэрдэммит хамаандатын бу сыллааҕы бүтэһик үөрэтэр эрчийэр түмсүү. Бу мадьынылар бары «Триумф» спорт уораҕайыгар дьарыктанан, спортка ситиһиилэрдэммиттэрэ. Онон спорт уораҕайа спортменнарга ураты суолталаах. Сүүмэрдэммит хамаандалары бэлэмниир киин быйыл үлэҕэ киирбитэ 10 сыла. Бу сыллар тухары манна үгүс спортсмен үүнэн таҕыста. Холобура, мас тардыһыыга Аан дойду үс төгүллээх чемпиона Дмитрий Попов кыайыы өрөгөйүн манна билбитэ.
"Манна элбэх көлөһөммүтүн тохпуппут, биһигини манна көрөллөр-истэллэр, бүөбэйдииллэр. Күрэхтэһэбит, мин биир бэйэм, үстэ Аан дойдуга кыттыбытым, үстэ бастаабытым. Бу барыта "Триумф" уораҕайыгар буолбута.“Триумф” уораҕайа миэхэ иккис дьиэм курдук буолар, манна кэллэхпинэ сүрдээҕин астынабын, сүргэм көтөҕүллэр. Киһи дьарыктаныан эрэ баҕарар", - диэн мас тардыһыыга Аан дойду үс төгүллээх чемпиона Дмитрий Попов кэпсиир.
Бу курдук баараҕай иэннэх спорт уораҕайа Уһук илиҥҥэ соҕотох. "Триумф" 2012 сыллаахха "Азия оҕолоро" норуоттар икки ардыларынааҕы оонньууну баттаһа арыллыбыта. Аан дойду таһымнаах күрэхтэһииттэн историятын саҕалаабыт эбийиэккэ 10 сыл устата үгүс үрдүк таһымнаах күрэхтэр аастылар. Ол курдук хас да көрүҥҥэ дойду чемпионаттара, көҥүл тустууга аан дойду Кубога, мас тардыһыытыгар аан дойду чемпионата чаҕылхай киирсиилэрин көрбүппүт. Күн бүгүн, киин 13 көрүҥҥэ спортменнары бэлэмниир.
"Үрдүттэн олорон кыһыны быһа сылы эргиччи эрчиллии бара турар. Аллараа Бэстээххэ сайыҥҥы баазалаахпыт. Спорт министиэристибэтин кэккэтинэн Алдан куоракка хайыһар баазалаахпыт. Онно Россия сүүмэрдэммит хамаандата кэлэн дьарыктанар. Биһиэхэ уопсайа 617 спортсмен киирэр", - диэн "Триумф" сүүмэрдэммит хамаандалары бэлэмниир киин дириэктэрэ Михаил Пахомов иһитиннэрдэ.
Мантан 7 спорстмена Россия үтүөлээх маастардара уонна 27 Аан дойду кылаастаах маастардар. Дьарык төгүрүк сыл тиһигин быспакка барар. Онтон быйылгы сыл бастыҥ ситиһиитэ - 34 сыл буолан баран, Владимир Егоров Европа чемпиона буолуута. Онон Саха сирин спортка ситиһиилэрэ барыта - Триумфу кытта ыкса сибээстээхтэр.
"Триумф спортсменнар биир баар-суох иккис дьиэбит буолар. Биһиги араас күрэхтэһиилэргэ барыахпыт иннинэ, Бүтү Россиятааҕы да буоллун, норуоттар икки ардыларынааҕы да буоллун, бары манна кэлэн хомууру ааһабыт", - диэн мас тардыһыыга Россия сүүмэрдэммит хамаандатын сүрүн тренерэ Николай Константинов этэр.
Спортменнары бэлэмниирин таһынан, "Триумф" куруутун нэһилиэнньэҕэ аһаҕас. Манна ким баҕалаах кэлэн сүүрүөн, эрчиллиэн сөп. Онон дьон-сэргэ эт-хаан өттүнэн чэбдигииритигэр эмиэ суолталаах сир. Тэрилтэ дьарыктанааччыга табыгастаах усулуобуйа олохтооһуну сүрүн болҕомтоҕо тутар. Үбүлүөйдээх сылы көрсө быйыл уларыттар сир тупсаҕай гына өрөмүөннэннэ.
"Триумф" Саха сиригэр спорт сайдыытыгар - сүрүн тирэх, нэһилиэнньэ эт - хаан өттүнэн чэбдигириитигэр - сүрүн түһүлгэ