Саха ынаҕын элбэтии
"Саха сүөһүтэ" хааһына тэрилтэтэ Эбээн-Бытантай улууһуттан, көтөр аалынан 20 хороҕор муостааҕы Дьокуускайга аҕалла. "Бэйэ боруода сүөһүтүн элбэтэр" бырагыраамма иитинэн кэлбит сүөһүлэр, салҕыы Нам улууһун Таастаҕар тиийиэхтэрэ.
Икки чаас халлааҥҥа дайан, Ан-26 көтөр аал Дьокуускай куораты булар. Сөмөлүөт буордуттан 20 төбө эдэр сүөһүнү, улахан кыамталаах тимир көлөҕө тиэйэн, айан салҕаныаҕа. Көтүү этэҥҥэ ааспыт.
"Дьокуускай куорат Туймаада хочотугар субай сүөһүлэри тиэйэн аҕаллыбыт. Бу 20 сыллаах араас гурууппа быйылгы төрүөҕүттэн 20 төбө. Сүөһүлэр айан устата туруктара үчүгэй этэ. Киэн дойдуга айаннаан иһэллэрин билэннэр, холкутук киирдилэр. Түһэллэригэр эмиэ куттамматылар", - диэн "Саха сүөһүтэ" тэрилтэ зоотехнига Алексей Варламов кэпсээтэ.
Хоту улуустан сүөһүлэри аҕалыы Тыа хаһаайыстыбатын министиэристибэтин өйөбүлүнэн тэриллибит. Анал рейс "Хотугу авиалиниялар" тэрилтэ нөҥүө оҥоһуллан, "Саха сүөһүтэ" тэрилтэ Эбээн-Бытантайдааҕы салаатыгар кыстык этэҥҥэ ааһарыгар туһулаан, 4 туонна сүөһү эбии аһылыгын, тиэхиникэҕэ саппаас чаастары уо.д.а. гурууһу тиэрдибит.
Санатар буоллахха, 2021 сыллаахха Нам улууһун Таастааҕар, саха боруода ынаҕын ууһатыыга туһуламмыт, 30 төбөҕө анаммыт миэстэлээх, лабораториялаах киин тутуута саҕаламмыта. Бу үлэ "Сахаагроплем" тэрилтэни кытта бииргэ барар. Племенной үлэ сүрүн соруга, киинтэн саха боруода оҕустарын атын оройуоннарга ыыталаан, хааны уларытыы буолар. Быйыл холобура, 6 төбө оҕуһу киин уонна Эбээн-Бытантай улууһун кытта атыстаһыннардылар. Бүгүҥҥү күн туругунан, "Саха сүөһүтэ" хааһына тэрилтэ 9 салаатыгар, 1 173 төбө саха боруода сүөһүтэ баар, онтон 345 төрүүр-ууһуур ынах