"Кырачаан ымыылар" уһуйаан оҕолору техническэй үөрэхтээһиҥҥэ сыһыарар.
2014 сыллаахха Бэрдьигэстээххэ саҥа тутуллан үлэҕэ киирбит "Кырачаан ымыылар" уһуйаан, аанын хара арыйыаҕыттан, кырачааннары техническэй үөрэхтээһиҥҥэ сыһыарар үлэтин ыытар. Иитээччилэр уонна төрөппүттэр оҕолорго анаан, араас үлэ хайысхалара хас түһүмэҕинэн баралларын көрдөрөр макеттары ымпыгар-чымпыгар диэри оҥорбуттара, киһини кэрэхсэтэр. Оҕолор кыра саастарыттан макеттары көрөн, тутан-хабан, оонньуу ньыматынан үлэ хаамыытын уонна идэлэри кытта ыкса билсэр кыахтара үөскүүр.
2021 сылга уһуйаан Россия президенин граныгар, научно-техническэй хайысханы сайыннарыы бырайыагар кыттан, 499 тыһ. солк ылбыта. Бырайыак иитинэн, "Start Junior" кабинет, "Мин дойдум - Россия" стендэ арылынна. Ону тэҥэ, авторскай семинар ыытылынна.
"Биһиги бастакы күн үлэлиэхпититтэн, төрөппүттэрбитин кытта ыкса сибэстээхтик үлэлиибит. Ол курдук бу бырагыраамманы апробациялыырбытыгар төрөппүттэрбит тэҥҥэ оҕолорун кытта сайданнар, техинческэй хайысхаҕа үлэлэһэннэр, көдөрөн үөрэтэр хонууларбытын төрөппүттэр оҥороллор. Уонна оҕолорун кытта быыстапканы көрөн-истэн тэҥҥэ үөрэнэллэр, сайдаллар", - диэн "Кырачаан ымыылар" уһуйаан сэбиэдиссэйэ Надежда Москвитина кэпсээтэ.
Оскуола иннинээҕи саастаах оҕолорго туһуламмыт "От фребеля до робота" анал бырагыраамманан, кырачаан ымыылар үлэлээбиттэрэ 5 сыл буолла. Онно анаан өрөспүүбүлүкэтээҕи авторскай семинары ыыттылар. Киэҥ тэрээһиҥҥэ 10 улуус уонна Дьокуускай куорат уьуйааннарын иитээччилэрэ аһаҕас дьарыктарга сырыттылар, семинардары иһиттилэр.
"Билим дьоҕус академията методическай консультациянан иилээн-саҕалаан илдьэ сылдьыбыппыт. Коллектив улахан таһымҥа үлэлиир диэхпин баҕарабын. Бу авторскай семинардарын үһүс төгулун ыытан эрэллэр. Уонна сүрүннээн, инженернай-техническай хайысханан күүскэ ылсан үлэлииллэрин көрдөрдүлэр", - диэн СӨ "Билим дьоҕус академиятын", оскуола иннинээҕи үөрэхтээһинин салаатын салайааччыта, педагогическай наука кандидата Ольга Степанова бэлиэтээтэ.
Бу күн "Россия - мин дойдум" диэн оҕолору патриотизмҥа уһуйар аныгы стендэ арыллан, кэлбит дьон интириэһин тарта. Ону тэҥэ семинар иитинэн, "Кырачаан ымыылар" уһуйаан, 5 сыллаах үлэтин түмүгүнэн оҥорон таһаарбыт методическэй ыйынньыгын ыалдьыттарга билиһиннэрдэ. Бу икки тылынан бэчээттэнэн тахсыбыт бэлэм матырыйааллары туһанан, улахан бөлөх уонна оскуола иннинээҕи саастаах оҕолору, хайа баҕар иитээччи, төрөппүт үөрэтэр кыахтаах.
Тэрээһиҥҥэ Сунтаар, Үөһээ Булуу, Таатта, Чурапчы курдук тэйиччи сытар улуустартан суол ырааҕын, халлаан тымныытын аахсыбакка кэлбиттэрэ, семинар уһуйаан педагогтарыгар наадалааҕын дакаастаата.
Бу курдук оҕолор инники идэлэрин сөпкө таба тайаналларыгар, техническэй хайысханы интириэһиргии улааталларыгар, "Кырачаан ымыылар" болҕомто ууран, аныгы кэм ыччаттарын иитэн таһаараллар.