Максим Кирович Аммосов  төрөөбүтэ 125 сыла

Бүгүн Саха чулуу уола, биллэр судаарыстыбыннай, уопсастыбыннай уонна политическай диэйэтэл Максим Кирович Аммосов төрөөбүт күнэ. Кини үбүлүөйдээх 125 сылын туолар дьоро күнүгэр уонна Өрөспүүбүлүкэ төрүттэммитэ 100,  Дьокуускай куорат төрөөбүтэ 390 сылларын бэлиэтии, "Чаҕылхай Максим суолунан" диэн ааттаах маассабай театрализованнай дьүһүйүү көстүөҕэ. Дьүһүйүүгэ Максим Аммосов олоҕун уонна Киргизияҕа, Казахстанна үлэлээбит сылларын хабан көрдөрүөхтэрэ.

"Бу үлэни туорарга Максим Аммосов туһунан үгүс элбэҕи хасыһан биллим. Кини олох оҕо эрдэҕиттэн, олоҥхону сүрдээх интириэһиргиир эбит. Дойдутугар олоҥхоһуттары истэн, бэйэтин бухатыырга холоон, куһаҕан тыыннары кытта охсуһар курдук саныыр. Ону ойуулуура үгүс ахтыыга суруллар. Кырдьык, кини бэйэтин норуотун таптыыра, норуота үчүгэй олоххо олоруон баҕарыытын туруулаһыыта, оҕо эрдэҕиттэн иҥэн тахсыбыт диэн түмүккэ кэллим. Дьүһүйүүгэ оҕо сааһа, үөрэҕэ, Сибииргэ тиийэн комсомуолу олохтооһуна, үрдүкү дуоһунаска сылдьыылара көстүөҕэ. Ыччат сэҥээрэн көрөрүн курдук оҥоро сатаатыбыт", - диэн А.Д. Макарова аатынан Дьокуускайдааҕы култуура  уонна искусство кэллиэһин дириэктэрэ, дьүһүйүү кылаабынай режиссёра Захар Никитин иһитиннэрдэ.

Тэрээһиҥҥэ тыһыынчаттан тахса култуура эйгэтигэр үлэлиир, үөрэнэр дьон кыттыыны ылыахтара. Маны тэҥэ, Максим Кирович тутта сылдьыбыт маллара,  архив, хаартыскалара быыстапка буолан көрдөрүүгэ туруохтара. "Чаҕылхай Максим суолунан" театрализованнай дьүһүйүү "Триумф" уораҕыйыгар бүгүн киэһээ 17:00 чаастан буолар. Киириитэ босхо.