Тымныы арҕаа улуустарга үрэлиннэ
Ааспыт нэдиэлэҕэ бэрт тымныы, туманнаах күн-дьыл турбут эбит буоллаҕына, бу күннэртэн халлаан кэм сылыйар өттүгэр барда. Гидрометеосулууспа иһитиннэрбитинэн, Тиихэй океантан сылаас салгын маассата кэлэн тымныыны арҕаа улуустарга үрэйдэ. Онон республика арҕаа өттүгэр тымныы буолара күүтүллэр.
Саха итэҕэлинэн ахсынньы Билгэ Хаан ыйа, онон ый бэлиэ күннэригэр олоҕуран, айылҕаны кэтээн көрөн кэлэр дьылы билгэлиэххэ сөп. Ахсынньы ыйынан кыһын салгыытын уонна от ыйын сирдэтэллэрэ. Кырдьаҕастар уон тоҕус чыыһылаҕа тымныы, 22-гэ тыаллаах буоллаҕына үүнүү өлгөм буолсу диллэрэ. Ахсынньы ый бүтэрэ чугаһаата, уонтан тахса эрэ хонук хаалла. Быйыл бу ый сүрүннээн тымныйда, ол курдук ааспыт нэдиэлэ устата үгүс улуустарга туманнаах, 50 кыраадыска диэри тымныылар турдулар. Оттон аҕыйах хонуктааҕыта күн-дьыл уларыйан лаппа сылыйда.
Саргылаана Никитина, Дьокуускайдааҕы гидрометеосулууспа күнү-дьылы сабаҕалааһын салаатын салайааччыта: "Онтон атын улуустарга түүнүн -33... -38, намыһах сирдэргэ түүн -43 күнүһүн -32... -37 кыраадыс тымныы туруоҕа".
Оттон хотуларга сүрүннэн сылаас халлаан турар. Ол курдук температура күнүһүн -20 эрэ кыраадыс тымныы. Муустаах муора кытылларыгар эмиэ сылаас, салгын температурата -10...-15 онтон Аллараа Халымаҕа, чуолаан Черскэйгэ 0 эрэ кыраадыс бэлиэтэннэ. Дьокуускайга бүгүн кыралаан хаардыа, туманнаах, тыаллаах салгын температурата күнүһүн -39 кыраадыс, түүнүн -42 тиийэр. Хайдах күн-дьыл турара суол-иис балаһыанньатыгар ыкса дьайар. Маныаха быһылаан тахсыыта аҕыйаабат.
Сыл саҕаланыаҕыттан республика үрдүнэн уопсайа 710 суол саахала тахсыбытын түмүгэр 82 киһи суорума суолланна, 941 киһи араас эчэйиини ылла. Былырыын баччаларга бү көрдөрүү уонтан тахса бырыһыанынан аҕыйах этэ. Бу күннэртэн саҕалаан тохсунньу 8 күнүгэр диэри "Болҕойуҥ оҕолор" диэн сэрэтии тэрээһинэ былаан быһыытынан тэриллэр. Маны тэҥэ бырааһынньыктар иннилэринэ бэрэбиэркэлиир рейдэ үлэлэрэ күүһүрүөхтэрэ.
"Саҥа дьыл дьалхааныгар буруйу оҥоруу күүһүрэр. Онон тимир көлөҕүтүн көрүнэ сылдьыҥ диэн сүбэлиэ этибит. Элбэх киһи тоҕуоругар сирдэригэр ордук болҕомтолоох буолуҥ"- диэн суолга-иискэ куттала суох буолууну хааччыйар СӨ государственнай инспекциятын пропагандаҕа инспиэктэрэ Күннэй Иванова нэһилиэнньэни сэрэттэ.
Тимир көлөнү уоруу түбэлтэтэ элбэхтик тахсар, быйыл уопсайа 155 массыынаны уорбуттара бэлиэтэммит. Онон суол-иис кыттааччылара, ыытааччылар эрэ буолакка, сатыы сылдьааччылар эмиэ айан суолугар бэрт сэрэхтээх буоларга ыҥыраллар.