Кыадаҥда олохтоохторо Гавриил Чиряев аатын үйэтитэр сыаллаахтар

Саха сирин биир биллэр судаарыстыбыннай уонна политическай диэйэтэлэ Гавриил Иосифович Чиряев аатын үйэтитэргэ, киэҥ  хабааннаах торумнаммыт үлэ ыытылыбакка турар. Күн бүгүн төрөөбүт алааһыгар олорон ааспыт дьиэтэ-уота сууллан, сири кытта тэҥнэһэн эрэр. Олохтоохтор чулуу уоллара олоро сылдьыбыт балаҕанын сөргүтэргэ уонна түмэлин өрө тардан үйэтитэргэ туруорасаллар.

Гавриил Иосифович Чиряев – Саха сирин биир биллэр судаарыстыбыннай уонна политическай диэйэтэлэ. Кини Ленин уонна Өктөөп революциятын уордьаннарын, Үлэ Кыһыл Знамята уордьан икки төгүллээх хаһаайына. 1965-1982 с.с. Саха сиринээҕи КПСС обкомун бастакы сэкэрэтээрэ. Саха АССР сайдыытыгар улахан кылаатын киллэрбит, биир тумус туттар чулуу уолбут.

Гавриил  Иосифович 1925  сыллаахха, билиҥҥинэн Чочу нэһилиэгин Кыадаҥдатыгар, Ураһалаах алааска күн сирин көрбүтэ. Оҕо сааһын саамай дьоллоох кэмнэрэ манна ааспыттара. Онтон билигин  төрөөбүт уйатыгар олоро сылдьыбыт балаҕана, сири кытта буорга кубулуйан эрэрэ киһини сонньутар. Олохтоох дьаһалта көмөтүнэн, билигин манна дьон кэлэн олорор сирэ эрэ тутуллан турар уонна бүттэ.

"Реконструкцияны туруорса сатыыбыт. Балаҕан курдук, онтон син биир баар буолуохтаах, олорбут өтөҕө", - диэн Г.И.Чиряев түмэлин харайааччыта Мария Плешакова этэр.

Түмэл үлэһиттэрэ эрэ буолбакка, олохтоох нэһилиэнньэ бары кэриэтэ, кини аатын кэнэҕэски ыччакка тиэрдэр сыалтан, кини аата өлбөөдүйбэтин туһуттан, төрөөбүт дьиэтин уонна түмэли сөргүтэргэ туруорасаллар.

"2025 сылга биһиги улууканнаах киһибит, Саха сирин сайдыытыгар уһулуччулаах, үтүөлээх Гавриил Иосифович Чиряевпыт, 100 сылын үрдүк таһымҥа бэлиэтиэхпит. Нэһилиэнньэ урут да көрдөспүтэ, билигин да көрдөһөр. Ол курдук, холобур ыллахпына, М.К. Аммосов музейа Нам улууһун Хатырыгар турар, П.А. Ойуунускай музейа Чөркөөххө, онтон Исидор Барахов музейа Үөһээ Бүлүүгэ Харбалаахха турар. Ол иһин нэһилиэнньэ көрдөһөр, Кыадандаҕа  таас дьиэ тутан, 100 сылын үөрэ-көтө көрсүбүт киһи", - диэн  Г.И.Чиряев түмэлин салайааччыта Михаил Томский этэр.

Билигин түмэл муниципальнай таһымҥа турар. Төрөөбүт алааһыгар бэлиэ сурук уонна нэһилиэк күүһүнэн тутуллубут беседка эрэ баар. Онон сахалар, биир тарбахха баттанар чулуу уолбут аатын үйэтитэргэ, күүстээх үлэ ыытыллар кэмэ уолдьаста.