Физкультура учууталлара күрэхтэһэллэр
Физкультура учууталлара дьүүллүүр хамыыһыйа иннигэр аһаҕас уруогу ыыталлар. Хас биирдии учуутал теорияны төһө билэрин, ону тэҥэ уруок ыытан көрдөрөрдүлэр. Учууталлар ааптарскай уруоктарын, бэйэлэрин айбыт оонньууларын оҕолорго үөрэтэллэр. Кыттааччылар этэллэринэн бу күрэххэ саамай сүрүнэ - уопут атастаһыыта.
Евдалек Попов, Олимпийскай эрэллэри бэлэмниир училище преподавателэ: "Учуутал киһи хаһан баҕар үүнэ-сайда сылдьыан наада, ол иһин маннык күрэхтэргэ уопут атастаһабыт. Баҕар мин оонньуубун ким эмэ сэҥээрэн уруоктарыгар туттуо. Онтон мин эмиэ бэйэбэр туһалааҕы иҥэринэбин. Онон туох баар кыахпытын ууран туран кыттабыт".
Бу күрэххэ 7 улуустан уонна Дьокуускай куораттан уопсайа 24 кыттааччы кэллэ. Маннык хабааннаах тэрээһин физкультура учууталларыгар 7 сыл устата буолбатах, онон быйыл саҥалыы тыыннанан ыытыллар. Тэрийээччилэр күрэҕи сыллата тэрийэр санаалаахтар.
Ольга Станова, Дьокуускай куорат 35 №-дээх анал коррекционнай оскуолатын дириэктэрэ: "Физическэй култуура учууталларыгар аналлаах күрэҕи биһиги аан бастакытын ыытабыт. Оҕо спордугар биһиги улахан болҕомтону уурабыт. Ол курдук оҕолорбут доруобуйаларынан хааччахтаах буолалларын быһыытынан, кинилэр эт-хаан өттүнэн сайдалларыгар ордук болҕомто уурабыт. Онон учууталбыт Юрий Иванович көҕүлээһинин өйөөммүт, бу маннык тэрээһини ыыта сылдьабыт".
Бу күн Юрий Ивановиьы үбүлүөйдээх сааһынан итиитик-истиҥник эҕэрдэлээн туран, араас наҕаараадалары туттардылар. Өрөспүүбүлүкэ үгүс учууталлара кинини холобур оҥостоллор, кини уопутун ылынан сахабыт сирин араас муннуктарыгар үлэлии-хамныы сылдьаллар. Уопуттаах учуутал “саамай сүрүнэ үлэҕин таптыаххын наада” диэн этэр.
Юрий Ощепков, Дьокуускай куорат 35 №-дээх анал коррекционнай оскуолатын физкультураҕа учуутала: "Учуутал киһи оҕону уонна үлэтин таптыахтаах. Оччоҕуна кини барытын ситиһиэн сөп. Бэйэ кыаҕын көрдөрөр туһугар элбэхтик үөрэниэххэ наада. Киһи үйэтин сааһын тухары үөрэнэр, онон бэлбэх күрэхтэргэ кыттар киһи,биллэн турар, элбэҕи ситиһэр".
Күрэхтэһии сүрүн сыалынан-соругунан физкультура учууталларын таһымнарын8рдэтии уонна кинилэргэ уопут атастаһыыга усулуобуйа олохтооһун буолар. Күрэх икки күн устата икки араас түһүлгэлэрин ыытылла турар. Ол курдук хас да түһүмэх түмүгүнэн бу күн бастыҥ физкультура учууталын быһаарыахтара.