Бэйэ дьыалата

Эдэр ыал, Охлопковтар, уруккуттан ыра оҥостубут санааларын олоххо киллэрэн, туризм хайысхатыгар ылсан үлэлии сылдьаллар. Киин куорат таһыгар ыалдьыттары сынньатар, хоннорор дьиэ туттараннар, билигин үлэлэрэ күөстүү оргуйар.

Уурбут-туппут курдук, сып-сылаас, киэҥ-куоҥ, киһи кэлэн сынньанар сирин эдэр ыал тутан, бэйэ дьыалаларын арыммыттар. Аныгы олох тэтимиттэн хаалсыбакка, болҕомтолорун иһинээҕи туризмы сайыннарарга ууран, барнхаус  арыйбыттар.

"Дьиэбит соторутааҕыта арыллыбыта. Улахан аһыыр сирдээх, күөх экран аттыгар дьыбааннаах, ас астыырга туспа куухуналаах, иккис мэндиэмэҥҥэ хостоох. Панораамнай түннүктэрдээх. Дьиэбит күөл таһыгар турар, онон сайын кумахтаах сөтүөлүүр сир буолар", - диэн эргиэмсик Ньургуйаана Охлопкова кэпсээтэ.

Дьону сынньатар сир кэрэ айылҕалаах, күөл үрдүгэр турар миэстэҕэ тутуллубут. Куораттан 30 км кэриҥэ тэйиччи сытар. Сайын оҕо-аймах, эдэр ыччат,   ыалдьыттар сөтүөлээн, сүүрэн-көтөн, чэбдигирэн  барыахтара диэн хаһаайыттар эрэннэрэллэр. Барнхаус иһэ, кырдьык, барыта дьоҥҥо анаммыт эбит. Онньуур приставка, ыллыыр аппаратура, оннооҕор атаххын массажтыыр тэрил ыалдьыттары үөрдүөҕэ. Бу маны барытын Охлопковтар, эдэр ыал Ньургуйааналаах Василий, иккиэн бииргэ толкуйдаабыттар. Манан тохтоон хаалбакка, эдэр эргиэмсиктэр былааннара киэҥ

"Учаастакпыт киэҥ буолан, икки гына аҥаардаатыбыт. Эһиил иккис дьиэни тутуохпут. Оччоҕуна толору туристическай база курдук буолар. Уопсайынан, куоракка туристическай база диэн сайдан эрэр. Эһиил граҥҥа кыттыахтаахпыт, сыал-сорук баар. Саха сирин иһигэр туризмы сайыннараары, туур оҥорооһун граныгар кыттыахтаахпыт", - диэн эргиэмсик Василий Охлопков санаатын үллэһиннэ.   

Биллэн турар, эдэр ыалга бастакы саҕалааһын ыарахаттардаах да буоллар, Охлопковтар кэҥиир-сайдар соруктаахтар. Күн бүгүн, Өрөспүүбүлүкэ үрдүнэн  ыалдьыттары керсер, дьоҥҥо туох баар усулуобуйата барыта тэриллибит кыра дьиэлэрдээх, туристическай комплекстар үксүүллэр. Бу бэйэбит олохтоохторбутун хааччыйар өҥөлөр буолаллар. Сынньалаҥҥа дьон наадыйыыта - төһүү буолар.