Саха сиригэр травматология салаата тэриллибитэ 70 сыла

Быйыл Саха сиригэр травматология салаата тэриллибитэ 70 сыла  бэлиэтэнэр. Бу күннэргэ өрөспүүбүлүкэ бары улуустарыттан травматолог быраастар мустаннар 70 сыллаах үлэ түмүктэрин дьүүллэстилэр, уопут атастастылар. Семинардар, куурустар ыытылыннылар.

Анатолий Горохов, СӨ доруобуйа харыстабылын министиэристибэтин сүрүн травматолог-бырааһа: «Өрөспүүбүлүкэ травматологтара бары муһуннулар уонна Новосибирскайтан,  Читаттан учуонайдар ыалдьыттыыллар».

1952 сыллаахха олунньу 1 күнүгэр өрөспүүбүлүкэтээҕи киин балыыһа иһигэр 25 куойкалаах травматология салаата арыллыыбыта. Онтон ыла сайдан, кэҥээн 2014 сыллаахха өрөспүүбүлүкэтээҕи иккис нүөмэрдээх балыыһа иһинэн травматология киинэ арыллан күн бүгүнүгэр диэри үлэлии-хамныы сылдьаллар.

Иван Иванов, СӨ 2 № - ээх балыыһа сүрүн бырааһа: “70 сыл устата үгүс сайдыы барда, ордук бүтэһик 10-15 сылларга. Күн бүгүн икки салаанан 75 куойка миэстэлээхпит. Маны таһынан улуустарга травматология салаалара үлэлииллэр”.

Кэмпириэнсийэ кыттыылаахатарыгар травматолог быраастар сүрүн оҥорор эпэрээссийэлэрин көрдөрдүлэр. Ол курдук эпэрээссийэлиир сиртэн быһа холбонууну мустубут дьон анал саалаҕа олорон көрдүлэр, онтон улуустар быһа холбонуунан. Хомойуох иһин, маннык эпэрээссийэлэр улуус балыыһаларыгар  оҥоһуллубаттар.

Анастасия Васильева, Хаҥалас улууһун киин балыыһатын хирург-бырааһа, травматолога: “Биһиги бэйэбит балыыһабытыгар итинник эпэрээссийэни оҥоруохпутун баҕарабыт да  анал аппараппыт суох. Дьиҥэ оҥорор кыах баар».

Инники атаҕын тоһуппут дьоҥҥо аппарат Илизарова диэни кэтэрдэллэрэ. Ол урукку ньыма, билигин медицина сайдан  тостууну эпэрээссийэлээн эмтииллэр. Бу ньыманан уҥуоҕун көннөттөрбүт киһи тута илиитин, атаҕын хамнатар кыахтанар, гиипсэ туруоруллубат.

Бу курдук Саха сирин травматология салаатын сулууспата үбүлүөйдээх сылын үгүс ситиһиилээх, күүстээх исписэлиистэрдээх көрсөр.