Саха сиригэр үлэтэ суох ахсаана аччыыр

Үлэ көрдөнүү, эбии идэҕэ үөрэнии уонна быстах кэмҥэ дьарык барыта нэһилиэнньэ дьарыктаах буолуу кииннэрин нөҥүө барар. Бу хайысханы  дойду үрдүнэн Моя работа диэн кииннэр сүрүннүүллэр. Дьокуускай олохтооҕо Ариан Иванов бэйэтэ үлэлээҕин таһынан эбии иккис үлэ көрдөнөр. Кини харабыл миэстэтин ыйыталаһар. Ариан бу иннинэ эмиэ дьарыктаах буолуу киинин нөҥүө үлэнэн хааччылла сылдьыбыт. Онон бу да сырыыга эбии дохуоттанарга эрэллээх кэлбит.   

Ариан Иванов, үлэ көрдөнөөччү: - "олохпут ыараан хамнас туохха да тиийбэт. Онон эбии үлэ көрдөнө кэллим".

Күн бүгүн өрөспүүбүлүкэҕэ үлэтэ суох ахсаана түһэр, бүтэһик чахчынан 30 тыһыынча киһи дьарыга суоҕа биллэр. Бу инники көрдөрүүнү кытары тэҥнээтэххэ 5 тыһыынчанан аччаабыт. Нэһилиэнньэ дьырыктаах буолуутун хааччыйыыга анаан быйыл өрөспүүбүлүкэҕэ 346 мөлүйүөн көрүллүбүтэ. Мантан 143 мөлүйүөнэ федеральнай бюджет хааһынатыттын анаммыта.

Анастасия Позднякова, СӨ дьарыктаах буолуу киинин бэрэссэдээтэлин бастакы солбуйааччыта: "Судаарыстыбаттан  кэлбит өйөбүлүнэн общественнай үлэ тэрилиннэ уонна үлэтиттэн уурайар ыксалга сылдьар эбэтэр толорута суох үлэ чаастаах дьоҥҥо быстах кэмнээх үлэнэн хааччыйыы тэрилиннэ. Дьарыктаах буолуу кииннэригэр быйыл уопсайа 26 тыһыынчаттан тахса киһи үлэ көрдөөн сырытта. Олор истэриттэн 16 тыһыынчата үлэ булла".

Үлэ миэстэтинэн хааччыйыы «Олохтоох дьону бырамыысыланнаска”  диэн бырагырааманан киэҥ далааһыннаахтык ыытыллар. Ол курдук бырайыак быйыл өссө тэнийэн, анардас бу сылга 12 тыһыынчаттан тахса киһи бөдөҥ тэрилтэлэргэ үлэҕэ ананна. Мантан аҥардара эдэр ыччат. Онтон Дьокуускай уонна Жатай уокуруктарыгар үлэтэ суох учуотугар 2937 киһи турар.  Бу көрдөрүүнү исписэлиистэр үчүгэйинэн сыаналыыллар.

Екатерина Федорова, Дьокуускайдааҕы дьарыктаах буолуу киинин салайааччытын солбуйааччы: "Быйыл үлэтэ суох ахсаана 38% кыччаата. Холобура, былырыын 3158 киһи этэ. Билигин биһиэхэ 6600 тыһыынча аһаҕас миэстэ баар".

Онтон "Демография" национальнай бырайыагынан үөрэттэриигэ быйыл 2 тыһыынчаттан тахса киһи хабылынна. Бу программаҕа хапсыбыттар федеральнай бюджет суотугар босхо идэни баһылаатылар.